ബംഗളൂരു: ഓണ്‍ലൈനില്‍ ഓര്‍ഡര്‍ ചെയ്ത ഭക്ഷണം വൈകിയതിനെ ചോദ്യം ചെയ്ത യുവതിയെ മര്‍ദിച്ച സംഭവത്തില്‍ ഡെലിവറി ബോയ് അറസ്റ്റില്‍. ബെംഗളൂരു സ്വദേശിയായ കാമരാജാണ് അറസ്റ്റിലായത്. ആക്രമണത്തില്‍ മൂക്കിന് പരിക്കേറ്റ് ചോരയൊലിപ്പിച്ചു കൊണ്ട് യുവതി സാമൂഹിക മാധ്യമങ്ങളില്‍ വീഡിയോ പോസ്റ്റ് ചെയ്തതോടെയാണ് സംഭവം പുറം ലോകമറിയുന്നത്. മേക്കപ്പ് ആര്‍ട്ടിസ്റ്റായ ഹിതേഷ ഇന്ദ്രാനിയാണ് ഡെലിവറി ബോയ് മര്‍ദിച്ചുവെന്ന പരാതിയില്‍ രംഗത്ത് വന്നത്.
അതേസമയം, തന്നെ ചെരുപ്പുകൊണ്ട് അടിക്കുന്നത് തടയാന്‍ ശ്രമിച്ചപ്പോഴാണ് വാതിലില്‍ തട്ടി യുവതിയുടെ മുഖത്ത് പരിക്കേറ്റതെന്നാണ് ഡെലിവറി ബോയ് പൊലീസിന് നല്‍കിയ മൊഴി. വൈകിയതിനാല്‍ ഓര്‍ഡര്‍ വേണ്ടെന്നും കസ്റ്റമര്‍ കെയറുമായി സംസാരിക്കുകയാണെന്ന് അറിയിച്ചെങ്കിലും ഡെലിവറി ബോയ് തിരിച്ചുപോയില്ല. ഇതേത്തുടര്‍ന്നുണ്ടായ വാക്ക് തര്‍ക്കത്തിന് പിന്നാലെയാണ് മര്‍ദനമുണ്ടായതെന്നും ഹിതേഷ പറഞ്ഞു.
