കൊച്ചി: ഒറ്റ ദിവസം കൊണ്ട് അഡ്വൈസ് നല്‍കി പി.എസ്.സി റാങ്ക് പട്ടിക റദ്ദുചെയ്തു. എറണാകുളം ജില്ലയിലെ പാര്‍ട്ട് ടൈം ഹിന്ദി ജൂനിയര്‍ ലാംഗ്വേജ് അധ്യാപിക തസ്തികയിലെ റാങ്ക് പട്ടികയോടാണ് പി.എസ്.സിയുടെ അസാധാരണ നടപടി. 2020 ആഗസ്റ്റില്‍ പുറത്തുവന്ന റാങ്ക് പട്ടികയില്‍ മെയിന്‍ ലിസ്റ്റില്‍ 15 പേരെ മാത്രമേ ഉള്‍പ്പെടുത്തിയിരുന്നുള്ളൂ.
എന്നാല്‍, ജില്ലയില്‍ 36 ഒഴിവുകള്‍ റിപ്പോര്‍ട്ട് ചെയ്തിട്ടുണ്ട്. യോഗ്യതയുള്ള 45 പേര്‍ ഉണ്ടായിരുന്ന സപ്ലിമെന്‍ററി ലിസ്റ്റ് നിലനില്‍ക്കെയാണ് റാങ്ക് പട്ടിക റദ്ദാക്കിയതെന്ന് ഉദ്യോഗാര്‍ഥികളായ സെമി, സൈഫുന്നിസ, ഷേര്‍ലി, സുനിത എന്നിവര്‍ വാര്‍ത്തസമ്മേളനത്തില്‍ പറഞ്ഞു. ലിസ്റ്റ് റദ്ദാക്കിയതിന് എതിരെ കോടതിയെ സമീപിച്ചപ്പോള്‍ പ്രശ്നം പരിഹരിക്കാന്‍ പി.എസ്.സിക്ക് കോടതി നിര്‍ദേശം നല്‍കിയിരുന്നു.
തുടര്‍ന്നും റാങ്ക് പട്ടിക റദ്ദാക്കാനുള്ള തീരുമാനം അറിയിച്ചതല്ലാതെ കൂടുതല്‍ നടപടികള്‍ പി.എസ്.സിയില്‍നിന്ന് ഉണ്ടായില്ല. വീണ്ടും കോടതിയെ സമീപിക്കാനുള്ള തയാറെടുപ്പിലാണ് തങ്ങളെന്നും അവര്‍ അറിയിച്ചു. ബുധനാഴ്ച രാവിലെ 11ന് ജില്ല പി.എസ്.സി ഓഫിസിന് മുന്നില്‍ ധര്‍ണ നടത്താനും തീരുമാനിച്ചിട്ടുണ്ട്.
